Kuehe, 19 jasyapy 2024, romoñepyrũ Guarani Ñe’ẽ ha Reko Mbo’esyry I Universidad de la República Facultad de Humanidades y Ciencias de la Educación-pe, opytáva Montevideo, Uruguáipe. Opávo ko peteĩha, oñemboguatavéta Guarani Ñe’ẽ ha Reko Mbo’esyry 2. Ko ñeporombo’e oñemboguatáta yvytu pepo rehe, araapy ha arapo jave, 18:00 aravo guive 19.30 peve. Ikatu oñemboguata oñemoĩ rupi oñoñe’ẽme Instituto Técnico Superior de Estudios Culturales y Lingüísticos Yvy Marãe’ỹ Paraguaigua ha Universidad de la República Uruguaigua.
Oñemoñepyrũ ko mbo’esyry 18:00 aravo jave, ha upépe oñe’ẽ Dra. Laura Marello Barreiro ha Dra. Yliana Virginia Rodríguez, Universidad de la República Centro de Lenguas Extranjeras-gua; upéichante avei Dr. Miguel Ángel Verón ha mbo’ehára Emilia Espínola, Instituto Yvy Marãe’ỹgua. Oñekombiva avei omoirũvo ko ñepyrũmbýpe karai Dr. Rubén Martínez Huelmo-pe, omotenondepava’ekue Mercosur Parlamento, guarani ñe’ẽ ha Paraguái angirũete, hetaite omba’apova’ekue jahechápa guarani ojejapyhy Mercosur Consejo ñe’ẽ teéramo ha ojeporu Mercosur Parlamento rembiporúramo avei.
Ko nivel peteĩha ipukúta irundy jasy, jasyapy guive jasypoteĩ meve. Omotenonde ko mbo’esyry ñe’ẽasahára ha mbo’ehára Emilia Espínola, mbo’ehára Instituto Yvy Marãe’ỹmegua. Amo 100 tapicha rupi oikesékuri oñemoarandúvo guarani ñe’ẽ upe mbo’ehaovusúpe, katu 40 añópente oñemoneĩ, upévante rehe tenda ojeguerekóva.
Kóicha romba’aporoína Yvy Marãe’ỹme jahechápa rombo’e ha rombohape ojekuaavévo guarani, ñe’ẽ ojeporuvéva Paraguái ha’e ko tetã mba’e teéva, ko tetã ryepýpe ha okápe. Argentina-pe avei romboguataroína koichagua mbo’esy mbo’ehaovusuháre.
San Lorenzo, 20 jasyapy 2024
0 comentarios