Fundación Yvy Marãe’ỹ, Paraguaigua, ha Asociación Cultural Garabide, País Vasco-gua, kuatia rupive, oñoñe’ẽme’ẽ omba’apo ñepyrũvo oñondive iñe’ẽnguéra rehehápe. Ko ñeñominga rupive, omombaretese hikuái iñe’ẽnguéra, guarani Paraguáipe ha euskera Euskal Herria-pe, ojojoguáva mokõivéva ohasa rupi ñemboyke ha oñorairõ rehe jahechápa oñeakãrapu’ã. Ko kuatia ojehai mokõi ñe’ẽme, guaraníme ha euskera-pe. Omboguapy héra Fundación Yvy Marãe’ỹ rérape imoakãhára, Tkj. Miguel Ángel Verón, ha Garabide rérape imburuvicha, Tkj. Iñaki Martínez de Luna.
Ko’ág̃a guive, mokõive temimoĩmby oheka mba’éichapa oñopytyvõta omombarete hag̃ua iñe’ẽ poruhára atykuéra; ko ñopytyvõ reheae ikatu oñembohape mbo’esyry, ñepytyvõ ha ombohasa ojupe hikuái hembihasakue. Avei, mokõivéva ombojoajúta guarani ha euskera ñe’ẽharakuérape, omo’ag̃uívo ambue tapicha ha temimoĩmby omba’apóva arandupy, tekombo’e, polítika, momarandu ha ambue mba’ére, ikatútava oipytyvõ ko tembiapo.
Ñoñe’ẽme’ẽ oñemoneĩ Aditu oñemboguata aja. Kóva hína peteĩ mbo’esyry ñe’ẽ ñembohekovejey rehegua Garabide omoakãva, ha oñemoaranduvehápe mbo’ehára Verón, Fundación Yvy Marãe’ỹ ha Instituto Técnico Superior de Estudios Culturales y Lingüísticos Yvy Marãe’ỹ rérape, opyta aja Euskal Herriápe.
«Euskal Herria rembihasa ohechauka ñandéve peteĩ ñe’ẽ oñemomichĩva ikatuha ohupyty jey henda tee, tetãygua ojoaju ha omba’apóma guive hesehápe ko’ẽreíre. Ko ñoñe’ẽme’ẽ rupive ikatúta ojeipykúi upe tape, ha avei ñamombe’u mba’épa jajapoñaína guarani ha ypykuéra ñe’ẽ rehehápe Paraguáipe», he’i Verón.
Temimoĩmbykuéra rehegua
Asociación Cultural Garabide niko temimoĩmby vasco, ndojejuhúiva tekuái ryepýpe ha omba’apóva oipytyvõ rekávo ambue ñe’ẽ oñemombaretévo; ha’e oñemongu’e ojekuaa ha oñemba’apo hag̃ua oñembohekove resãivo arandupy ha ñe’ẽ tee, ko’ýte umi tapicha aty oñemongu’evahína omombaretejeývo iñarandupy ha iñe’ẽ.
Fundación Yvy Marãe’ỹ katu temimoĩmby paraguaigua opa hendáicha oñeha’ãva oipytyvõmi rekávo ko tetãme ipyrenda porã ha imbareteve hag̃ua opaite teko ha ñe’ẽ, opavavéva tojokupyty, tove toñembojoja guarani ha castellano jeporu tetã ñe’ẽ tee háicha Estado rembiapo ha tetãygua apytépe; upéichante avei toñemyasãi ha toñepysyrõ ypykuéra ayvu ha derecho oguerekóva opaite tapicha oikovévo iñe’ẽme.
San Lorenzo, 30 jasypa 2026
0 comentarios