ARANDUKA ÑEMYASÃI

“ÑE’Ẽ PORUPYRÃ MBO’EHAKOTYPEGUA”

Ko árape 18 jasypa, Fundación ha Instituto Yvy Marãe’ỹ rógape, opytáva San Lorenzo távape, tape Coronel Romero 318 ha Coronel Bogado-pe, 19:00 aravo jave ojehechauka ñepyrũta aranduka “Ñe’ẽ porupyrã mbo’ehakotypegua”, Lilian Aliente ha Huber Meili apopyréva.

Ko aranduka iñapysẽvahína pojoapy neporãva ojekuaapyhy hag̃ua guarani ñe’ẽ. Oñembosako’i ojeporu rekávo mbo’ehakotýpe, mbo’ehára ha temimbo’épe oipytyvõ  hag̃ua; katu tapicha oñemoaranduséva ha’eño oiporukuaánte avei, hetaiterei tembiaporã oñemboguapýre ipype.

Tembiapo pyahu ojehechauka ñepyrũtava rehe oñe’ẽasãita Dr. Miguel Verón, Fundación Yvy Marãe’ỹ Moakãhára.

 “Ñe’ẽ porupyrã mbo’ehakotypegua” añetehápe oipytyvõ mbaretéta guarani ñe’ẽ oñeporombo’e, ojekuaa, ojehayhuka, ojeporu ha oñemoherakuã ha hag̃ua. Ko arandukápe oñemboguapy 2500 rasami ñe’ẽjoaju, ikatúva ojeiporu 45 contexto comunicativo-pe.

Ko aranduka ñe’ẽtenondegua ohaíkuri Dr. Carlos Ferreira, Guarani Ñe’ẽ Rerekuapavẽ Yta, Dr. David Galeano, Ateneo de Lengua y Cultura Guaraní Sãmbyhyharapavẽ ha Dr. Miguel Verón Fundación  ha Intituto Yvy Marãe’ỹ Moakãhára.

San Lorenzo táva, 18 jasypa 2023