Guarani Ñe’ẽ Rerekuapavẽ oiporavo imoakãhára pyahurã

Kuehe, 21 jasykõi, Ñe’ẽ Ypy Ára Yvy Ape Ári, Guarani Ñe’ẽ Rerekuapavẽ (GÑR) oñemoamandaje oiporavo rekávo imoakãhára pyahurã, hóga opytása Paraguay távape. Oñembosako’i peteĩ terarysýi año, omoakãva haihára ha ñe’ẽpapára Mauro Lugo ha ñe’ẽpykuaahára, haihára ha jurista Tadeo Zarratea.

Ojeporavo rire moakãharakuéra, ko’ã tapicha omotenondéta GÑR mbohapy ary pukukue: Yta: Terekuára Mauro Lugo; Ytamirĩ peteĩha, terekuára Tadeo Zarratea; Ytamirĩ Mokõiha, terekuára Alcibiades González Delvalle; Viru Rerekua, terekuára Lino Trinidad Sanabria; Pytyvõharapavẽ, terekuára Cristina Invernizzi. Atypavẽ Pehẽ omba’apova’erãva guarani rehe opyta kóicha: terekuára Mario Rubén Álvarez, Atypavẽ Pehẽ omba’apóva Ñe’ẽporãhaipyre ha Ñemoasãi rehe Moakãhára; terekuára Perla Álvarez, Atypavẽ Pehẽ omba’apóva Ñe’ẽpykuaa rehe Moakãhára; terekuára María Georgina González Morán, Atypavẽ Pehẽ omba’apóva Tetãygua ñe’ẽ reko ha Ñe’ẽkõi rehe Moakãhára; terekuára María Gloria Pereira, Atypavẽ Pehẽ omba’apóva Ñe’ẽndy ha Ñe’ẽ pyahukuéra rehe Moakãhára; terekuára Juan Félix González, Atypavẽ Pehẽ omba’aóva Ñe’ẽtekuaa ha Jehaikatu rehe Moakãhára; terekuára David A. Galeano, Atypavẽ Pehẽ omba’apóva Avañe’ẽ Ñepysyrõ ha Ijeporuve rehe Moakãhára. Ojeporavo avei tapicha opytátava Tribunal Electorl-pe, ha umivahína terekuára Miguel Ángel Verón; terekuára Alberto Luna,  ha terekuára Almidio Aquino.

Guarani Ñe’ẽ Rerekuapavẽ Yta pyahu, karai Mauro Lugo niko haihára guarani ha castellano-pegua, ombohasáma guaraníme hetaiterei tembiapokue, ombo’e Universidad Nacional de Asunción, Fundación Yvy Marãe’y rogapygua ha ombo’e Instituto Técnico Superior de Estudios Culturales y Lingüísticos Yvy Marãe’ỹ-me. Karai Ytamirĩ, Tadeo Zarratea katu ohaiva’ekue mombe’upyrusu peteĩha ojepyaháva guaraníme, Kalaíto Pombero; ha’ehína ñe’ẽpykuaahára, tembikuaajára derecho-pe, político, oikeva’ekue Asamblea Nacional Constituyente yma 1992-pe, tetã senador ha omoakãva’ekue Taller de la Sociedad Civil, heta temimoĩmby ijaty haguépe ojehupyty hag̃ua Léi 4251/10 Ñe’ẽnguéra rehegua.

Guarani Ñe’ẽ Rerekuapavẽ oĩva Paraguáipe oñemoingo ypy Léi 4.251/10, “Ñe’ẽnguéra Reheguáva” rupive, ha ojepyso  ipokatu Paraguái yvy tuichakue javeve ikatu kuaa hag̃uáicha omboheko guarani ñe’ẽ ijehaípe, iñe’ẽndýpe, iñe’ẽ teépe, iñe’ẽtekuaápe ha iñe’ẽsyrýpe. Ipype ojejuhu 30 terekuára papapýva ha heta terekuára imomba’epýva ha moirũmbýva Paraguái ha pytayguáva.

San Lorenzo táva, 22 jasykõi 2024