Ág̃a arapo 31 jasypa, arapoteĩ 1 ha arapokõi 2 jasypateĩme, Fundación Yvy Marãe’ỹ ha Instituto Técnico Superior de Estudios Culturales y Lingüísticos Yvy Marãe’ỹ ojapóta Ñe’ẽasa, Tapereka, Arandupyheta ha Ñe’ẽheta rehegua Amandaje Oĩhápe Tetãygua ha Pytaygua IX «Ypykuéra Ñe’ẽita Yvy Ape Arigua Pa Ary», yvytu pepo ha hóga opytáva tape Coronel Romero 318, San Lorenzo távape guive.
Upe amandajépe oñe’ẽta 40 rasa tapicha katupyry ohykuavótava tembiakuaa ha marandu, oko’ítava Paraguay, Argentina, Brasil, Bolivia, Colombia, Perú, Ecuador, México, Estados Unidos, Uruguay, Chile, España, Inglaterra, Finlandia, Francia, Noruega ha Australia-gui. Ko Amandaje rupive ojeguerojerase tenda tembikuaa ha arandupy rehegua ikatuhápe tapicha ohaperekáva arandupy, ñe’ẽpykuaahára, ñe’ẽasahára, ñe’ẽtegueroheñoihára, ñe’ẽ rape’apohára, ñe’e ombohekoveresãijeýva, arandupy ha ñe’ẽ myasãihára oñovaitĩ ha oikuaauka hembiapokue oipysyrõ, ohape’apo, ombohekoveresãi ha omyasãi arandupy ha ñe’ẽ yvotyty .
Ko tapicha jejuhu guasu reheae oñembojoapyvéta pokõi ojapomava’ekue Marãe’ỹ ary 2016, 2017, 2018, 2019, 2020, 2021, 2022 ha 2023-pe, heta tapicha oike haguépe oporohendu ha oñe’ẽ Paraguái ha tetã ambuégui, taha’e omba’apóva ñe’ẽ rapereka, ñe’ẽ ñeisãmbyhy ha rape’apo, avakuaaty, ha ñe’ẽ ñemyasãi, ñemombarete ha ñembo’épe.
Fundación Yvy Marãe’ỹ niko temimoĩmby oñemoheñoiva’ekue 2005-pe, oñemoingéva léi rendondépe Personería Jurídica N° 9184/07 rupive. Instituto Yvy Marãe’ỹ katu oñemoheñói 2012-pe, Fundación guive, ha Tekombo’e ha Tembikuaa Motenondeha (TTM) omboaje ichupe Hembiapoukapy Ppy 1261/12 rupive; ha’e ojerojera jahechápa oñembokatupyry técnico ha tapicha iñapytu’ũjera porãva oñeikotevẽháicha ko tetã, ko regiõ ha yvy ape ári, taha’e ñe’ẽ, arandupy ñemyasãi, ñe’ẽ ha arandupy raperekápe hamba’e, jahechápa oñepytyvõ ko yvy ape ári imbarete ha hesãikatuĩvo opaite arandupy ha ñe’ẽ, tove ha’ekuéra toikove jokupytýpe oñondive.
Naciones Unidas Amandaje Guasu, upe 2019-pe, ojapyhy (resolución A/RES/74/135) ary 2022-2032 Ypykuéra Ñe’ẽita Yvy Ape Arigua Pa Ary-ramo, ohekáva mayma ñe’ẽ poruhára oñemomba’e ha omoĩvo ijatipy ijayvu rehehápe. Yvy Marãe’ỹ ojoaju ha oykeko temomoĩmy háicha ko tembiaporã guasu, ko amandaje rupive.
Tapicha oikeséva ko amandajépe ikatu omboguapy héra ko formulario rupi: https://docs.google.com/forms/d/e/1FAIpQLSc4IC6d5_KRk_GD2TfIsWYO7S1pi0VMFaWLDciXVDUovBnizw/viewform?sfnsn=wa térã oñemboja ko temimoĩmby rógape, opytáva Cnel. Romero 318 ha Cnel. Bogado, San Lorenzo távape. Avei ombohapekuaa iñeime ohenóivo pumbyry (021) 580548 ha 0983 866818-pe, ỹrõ ohai correo-pe: [email protected]. Hetave marandu ojejuhukuaa: Web: www.yvymaraey.com.py
San Lorenzo, 12 de jasypa de 2024
0 comentarios